پرۆگرامێ پاراستن و ب هێزكرنا ژنان ل عیراقێ و ده‌ستپێكرنا پرۆژێ نوى یێ چه‌ندین رێكخراوان هاته‌ پێشان دان

ئه‌ڤرۆ رێكه‌فتى 28/1/2020 ب ئاماه‌بوونا به‌رێز إسماعیل محمد احمد هاریكارێ پارێزگارێ دهۆكێ بۆ كاروبارێن ئاواران و په‌نابه‌ران و و خانم مایكا مایسر جێگرا قۆنسلێ هۆلندا ل عیراقێ و خانم مندانا به‌رپرسا رێكخراوا هاریكاریێن خه‌لكێ نه‌رویژى NPA ل هه‌رێما كوردستانێ ونوینه‌رێن رێكخراوێن (PDO,كۆمه‌لا ئافره‌تێن به‌غدا BWA,ئێمه‌، رێكخراوا برایه‌تى یا ئێزدى) رێ و رسمێن ب دۆماهیك هاتنا پرۆگرامێ پاراستن وهێزكرنا ژنان ل دهۆك و نه‌ینه‌وا و ده‌ست پێكرنا پرۆژێ نوى یێ ل ژێر ناڤێ “به‌رزكرنا باشى، رومه‌تى و ئارامى یا رزگاربویێن توند وتیژیا ل سه‌ر بنه‌مایێ ره‌گه‌زى یێن كو ناكۆكیا كارتێكرن لێ كرین”، ل خۆارنگه‌ها میدیا سه‌رایێ ل دهۆكێ هاتن ئه‌نجام دان.

ل پێشێى خانم مندانا به‌رپرسا NPA ل هه‌رێما كوردستانێ باسى كارێ رێكخراوا خۆ كر ل ناڤا كه‌مپێن ئاواران و په‌نابه‌ران، و ئاماژه‌ دا كو NPA ب رێ یا هه‌ڤپشكێن خۆ (PDO BWA,ئێمه‌، رێكخراوا برایه‌تى یا ئێزدى)، د ماوێ سێ سالێن بۆرى دا چه‌ندین كار و پرۆژه‌ ئه‌نجام دانه‌ بۆ ئافره‌تێن ئاواره‌ ل دهۆك و نه‌ینه‌وا، و ژلایه‌كى دیڤه‌ ئاماژه‌ دا پلان وبه‌رنامێ سێ سالى بۆرى و ده‌ستپێكرنا پرۆژێ نوى یێ خزمه‌تكرن و پشته‌ڤانیكرنا ئافره‌تان

دیف دا په‌یڤا هاریكارێ پارێزگارێ دهۆكێ به‌رێز إسماعیل محمد احمد هات پێشكێشكرن، هاریكارێ پارێزگارى سۆپاسیا رێكخه‌رێن چالاكیێ كر و ده‌ست خۆشى ل وان رێكخراوان كر كو بۆ دماوێ بۆرى دا چه‌ندین كار و چالاكى ل ناڤ ئاواران و په‌نابه‌ران ئه‌نجام داین ب تایبه‌ت د بوارێ ئافره‌تێ دا، هه‌رۆسا سۆپاسا كارگیریێن كه‌مپان وستافێ بۆردێ كاروبارێن مرۆڤایه‌تى بۆ خزمه‌تكرن ئاواران و په‌نابه‌ران و بتایبه‌ت ئه‌وان ئافره‌تێن رزگاربویێن ده‌ستێ داعش.

پاشى په‌یڤێن قۆنسلیا هۆله‌ندى و نوینه‌رین ریكخراوا هاتن پێشكێشكرن، هه‌رهۆسا كۆرته‌ فیلمه‌ت ل دۆر كارێن رێكخراوان و پێشانگه‌هه‌كا كارێ ده‌ستى هاتنه‌ نمایشكرن، ئه‌ڤ چالاكى بۆ دیاركرنا رۆل و ئه‌نجامێ وان كارێن دماوێ سێ سالێن بۆرى دا بۆ كج و ژنێن ئاواره‌ ل دهۆك و نه‌ینه‌وه‌ هاتى پێشكێشكرن ژلایێ رێكخراوا هاریكاریێن خه‌لكێ نه‌رویژى NPA ب هه‌ڤكارى دگه‌ل هه‌ڤ پشكێن خۆ، و ده‌ست ب كاربوونا پرۆژێ نویه‌ كو دێ بۆماوێ چار سالێن دى دێ هێته‌ ئه‌نجام دان پێخه‌مه‌ت بتر پشته‌ڤانیكرنا ئافره‌تێن ئاواره‌ ل دهۆك و نه‌ینه‌وا