وركشۆپه‌ك ل دۆر هێزكرنا ژینگه‌ها یاسایى و مه‌ده‌نى هاته‌ ئه‌نجام دا

ل رێكه‌فتى ٩/١/٢٠٢٠ ل ئۆتیلا ژیان ل پارێزگه‌ها دهۆكێ ب ئاماده‌بوونا به‌رێز إسماعیل محمد احمد هاریكارێ پارێزگارێ دهۆكێ بۆ كاروبارێن ئاواران وپه‌نابه‌ران، رێڤه‌به‌ریا رێكخراوێن ناحكومى وب هه‌ڤكارى دگه‌ل رێكخراوا Humanitarian Help Hands ۆركشۆپه‌ك بۆ ژماره‌كا ریڤه‌به‌ریێن پارێزگه‌ها دهۆكێ ل ژێر ناڤێ (به‌هێزكرنا ژینگه‌ها یاسایى كۆمه‌لا مه‌ده‌نى) ئه‌نجام دا

ل ده‌ستپێكا وركشۆپى به‌رێز إسماعیل محمد سۆپاسیا رێڤه‌به‌ریا رێكخراوێن نه‌حكومى ل هه‌ولێرێ كر بۆ رێكخستنا وركشۆپى، و ئاماژه‌ دا كو ل پارێزگه‌ها دهۆكێ ژماره‌كا مه‌زنا رێكخراوێن ناحكومى هه‌نه‌ ب هه‌ماهه‌نگى دگه‌ل دام و ده‌زگایێن پارێزگه‌ها دهۆكێ كار دكه‌ن ل ناڤ ئاواران و په‌نابه‌ران وده‌ڤه‌رێن جودایێ پارێزگه‌ها دهۆكێ دا، دیسان هاریكارێ پارێزگارى داخواز كر كو ئه‌ڤ رێكخراوا بتر پشته‌ڤانیا وان بێته‌ كرن و بتر كارێ وان بهێته‌ رێكخستن داكو ل پاشه‌رۆژێ بشێن ل جهێ رێكخراوێ ده‌ولى كاربكه‌ن و خزمه‌تێ پێشكێش بكه‌ن

دیف دا په‌نه‌لێن وركشۆپى ده‌ستپێكر، په‌نه‌لێ ئێكێ ل دۆر كار و چالاكیێن فه‌رمانگا رێكخراوێن ناحكومی بوو و ئه‌و ئاسته‌نكێ دكه‌ڤنه‌ رێكا فه‌رمانگه‌هێ و رێكخراوان دا، په‌نه‌لێ دووێ ل دۆر رۆنكرنا یاسایا ژماره‌ 1 یا سالا 2011 و به‌ره‌وه‌رد كرن دگه‌ل یاسایا دام و ده‌زگایێن ترى حكومه‌تێ، ل دۆماهیا وركشۆپى دان و ستاندن و چه‌ندین راسپارده‌ هاتن دیاركرن پێخه‌مه‌ت چاره‌سه‌ركرنا وان كێشا ئه‌وێن دكه‌ڤنه‌ درێكا رێكخراوان دا پێخه‌مه‌ت بتر هێزكرنا رۆلێ رێكخراوان ل هه‌رێما كوردستانێ