دهوكێ خه‌لاتێ ئاشتیێ یێ نیڤ ده‌وله‌تى وه‌رگرت

پشتى شاندێ پارێزگه‌ها دهوكێ پشكدارى كرى دكونگرێ سالانه‌ یێ سه‌ركردێن نافخویى وجیهانى (UCLG) ئه‌وێ ژلایێ رابیتا شیانێن حكومه‌تێن نافخویى یا هوله‌ندى ل وه‌لاتێ ژێریا ئه‌فریقیا ل روژێن ١١ هه‌تا ١٥/١١/٢٠١٩ هاتیه‌ ئه‌نجامدان وباژێرێ دهوكێ ژى هاتیه‌ خه‌لاتكرن وه‌كو پێنچ باشترین باژێرێن جیهانێ یێن ئاشتى وپێكڤه‌ ژیانێ، ل دور وه‌رگرتنا خه‌لاتى ئه‌ڤرو ئێڤارى١٨/١١/٢٠١٩ كونگره‌كێ روژنامه‌ڤانى بو شاندێ پارێزگه‌ها دهوكێ یێ سه‌ره‌دانا باشورێ ئه‌فریقیا كرى وپشكداربوین دبه‌ریكانا بده‌ستڤه‌ ئینانا خه‌لاتێ باژێرێ ئاشتیێ به‌رێزان اسماعیل احمد محمد هاریكارێ پارێزگه‌رى بو كاروبارێن ئاواره‌ وپه‌نابه‌ران وادریس نه‌بى رێڤه‌به‌رێ كارگێرى یێ بوردێ كاروبارێن مروڤایه‌تى ل پارێزگه‌ها دهوكێ هاته‌ ئه‌نجامدان .
لبه‌راهیێ ادریس نه‌بى به‌حسێ سازیا (UCLG) كر وگوت: ئه‌ف رێكخراوه‌ UCLG ل سالا 2004 هاتیه‌ دامه‌زراندن، لده‌مێ حكومه‌تێن خوجهى و ده‌ستهه‌لاتێن نافخویى لسه‌رانسه‌رى جیهانێ بریاردایى كو ئێك ده‌نگ بن به‌رامبه‌ر كومه‌لگه‌هێ نیڤ ده‌وله‌وتى، بنگه‌هێ وێ یێ سه‌ره‌كى یێ ل به‌رشه‌لونا ل ئیسپانیایه‌.
رێكخراوا UCLG نوینه‌راتیا 5 ملیار كه‌سان لسه‌رانسه‌رى جیهانێ دكه‌ت كو دبیته‌ رێژه‌یا 70% ژ ئاكنجیێن جیهانێ و 140 ئه‌ندامێن نه‌ته‌وێن ئێكگرتى بخوڤه‌ دگریت، نوینه‌راتى و پشته‌ڤانیا بابه‌تێن جهێ پویته‌پێدانا حكومه‌تێن خوجهى و ئیقلیمى لجیهانێ دكه‌ت.
UCLG گرنگیێ ب بوها و ئارمانج و ده‌ستكه‌فتیێن حوكمێ زاتى و دیموكراتى یا نافخویى دده‌ت ب رێكا هه‌فكاریكرنێ دناڤبه‌را حكومه‌تێن خوجهى و ئیقلیمى دگه‌ل كومه‌لگه‌هێ نیڤده‌وله‌تیێ به‌رفره‌ه دێ بیته‌ ده‌نگێ ئێكگرتى بو پشته‌ڤانیكرنا حكومه‌تێن خوجهى و ئیقلیمى.
ئارمانجێن رێكخراوێ ئه‌وه‌ ببیته‌ ده‌نگێ جیهانێ و پشته‌ڤانیێ ل حكومه‌تێن خوجهى و هه‌رێمى دكه‌ت،بهێزكرنا كارێ نافخویى بو پشتگریكرنا گه‌شه‌پێدانێ وبهێزكرنا حكومه‌تێن خو جهى و ئیقلیمى و كومه‌لێن نیشتیمانى، پشته‌ڤانیكرنا داهێنانێ بو مه‌ره‌مێن حوكمێ خوجهى.
هه‌روه‌سا گوت: ئه‌ندامێن رێكخراوێ پێزانینان به‌لافدكه‌ن لدور گه‌هشتنا خزمه‌تگوزاریێن سه‌ره‌كى بو ئاواره‌ و په‌نابه‌را، یه‌كسانى دناڤبه‌را ره‌گه‌زاندا ، لامه‌ركه‌زیه‌ت و دیموكراسیا نافخویى ،ئابوریا نافخویى و ره‌وشه‌نبیرى و گونجاندنا كومه‌لایه‌تى و مافێن مروڤى ،گوهرینا كه‌ش و هه‌وایى رویپیڤانا ستراتیژى دگه‌ل ئێكه‌تیا ئه‌وروپى ودانانا راده‌یه‌كى بو مه‌ترسیێن كاره‌ساتان و هه‌فكارى كرن ژپێخه‌مه‌ت گه‌شه‌پێدانێ ئاڤ و پاقژیێ.
پاش به‌رێز اسماعیل محمد هاریكارێ پارێزگه‌رێ دهوکێ بو كاروبارێن ئاواره‌ وپه‌نابه‌ران به‌حسێ پشكداریا شاندێ پارێزگه‌هێ كر دكونگرێ ناڤبرى دا وگوت: ئه‌م ژلایێ رێكخراوا باژێرڤانیا حكومى (VNG) یا هوله‌ندى هاتینه‌ ده‌ست نیشانكرن كو پشكداریێ دكونگره‌یدا بكه‌ین بو بده‌ست ڤه‌ ئینانا خه‌لاتێ ئاشتیێ یێ نیڤ ده‌وله‌تى كو لباژێرێ باشورێ ئه‌فریقیا ل روژێن ١١ هه‌تا ١٥/١١/٢٠١٩ هاته‌ ئه‌نجامدان و(30) باژێرڤانی ل بیست وه‌لاتان پشكدارى تێدا كربون، وپشتى پروژێن پشكدار هاتینه‌ ڤاڤارتن (5) باژێرڤانى گه‌هشتنه‌ قوناغا دوماهیێ باژێرێ دهوكێ وباژێر عرسال ل لبنان وسێ باژێرێن وه‌لاتێ كولومبیا بون وپشتى ڤێ قوناغێ مه‌ فلمه‌كێ دیكیومه‌نتى یێ( 5)ده‌قیقه‌ى ب هاریكاریا  وارتى ڤى چێكربو ل دور چاوانیا خزمه‌تكرنا ئاواره‌یان ومه‌ فلم بو لیژنا تایبه‌ت ل ١١/٩/٢٠١٩ فرێكر وهاته‌ قه‌بولكرن وبه‌رى كونگره‌ ده‌ست پێ بكه‌ت فلم ل سه‌ر مالپه‌رێ وان هاته‌ به‌لافكرن وئه‌م هاتینه‌ ئاگه‌هدار كرن كو دهوك ژى وه‌كو چار باژێرێن دى دێ هێته‌ خه‌لاتكرن بو ب ده‌ستڤه‌ ئینانا خه‌لاتێ ئاشتیێ .
دهه‌لبژاراتنێ دا ته‌كه‌زیا لیژنێ ل سه‌ر چاوانیا وه‌رگرتن وسه‌ره‌ده‌ریا دگه‌ل وێ ژمارا زور یا ئاواره‌ وپه‌نابه‌ران هاتیه‌ كرن وكا چاوا خه‌لكێ پارێزگه‌هێ وكارگێریا ده‌ڤه‌رێ هاریكاریا وان كریه‌ وچاوا حه‌واندینه‌ ویا دى كا ئه‌ڤ خه‌لكه‌ كینه‌ چ ئولن چ مه‌زهه‌بن چ نه‌ته‌وه‌نه‌ چاوا هوون شیاینه‌ هه‌موویان بهه‌ڤرا هه‌مبێزكه‌ن وخزمه‌تا وان بكه‌ن كو چ ئاریشه‌ په‌یدانه‌بن.
مه‌ بو وان دیاركر كو هه‌موو ئاواره‌ وپه‌نابه‌ر دئازادبون دهاتن وچونێ دا هه‌روه‌سا بو دیتنا ده‌لیڤێن كاركرنێ وئه‌نجامدانا چه‌ندین چالاكیێن ره‌وشه‌نبیرى وكومه‌لایه‌تى وه‌رزشى ب رێكا چه‌ندین سه‌نته‌ر وبنگه‌هان ئه‌ڤه‌ كار وخزمه‌ت هه‌موو بوینه‌ هوكار كو بگه‌هینه‌ قوناغا دوماهیێ یا به‌ریكانێ .
كونگره‌ى ژ(١١-١٥)/١١/٢٠١٩ ده‌ست پێكربوو وئه‌م هه‌ر ٥ باژێرڤانى داخازكربوین ومه‌ هه‌موو به‌رنامه‌ وپلانێن خو به‌رهه‌ڤكربون ول دوماهیێ باژێرێ عه‌رسال ل لبنان ده‌ركه‌ت یێ ئێكێ وئه‌م دهوك ژى یێن دووێ بوین مه‌ خه‌لاتێ ئاشتیێ وه‌رگرتى ول دوڤ مه‌ دا هه‌رسێ باژێرێن كولومبیا بوون.