بتر ژ ١٠ هه‌زار په‌نابه‌رێن رۆژئاڤایێ كوردستانێ ل كه‌مپا به‌رده‌ره‌ش ئاكنجى بوون

پشتى ره‌وشا ئه‌منى ل رۆژئاڤایێ كوردستانێ نه‌ ئارام بوى ژ ئه‌گه‌رێ هێرشا تۆركا بۆ وێ ناوچه‌یێ، ب هه‌زاران كوردێن رۆژئاڤایێ كوردستانێ كۆچكرنه‌ هه‌رێما كوردستانێ ل كه‌مپا به‌رده‌رش هاتن ئاكنجى كرن و ژمارا وان په‌نابه‌رێن هاتن كه‌مپێ گه‌هشتنه‌ 10839 كه‌سان
بۆردێ كاروبارێن مرۆڤایه‌تى BRHA و رێكخراوا UNHCR وده‌زگایێ خێرخوازى یێ بارزانى BCF ب هه‌ماهه‌نگى دگه‌ل چه‌ندین رێكخراوێن دیتر كارێ سه‌رپه‌رشتى و رێكخستن و گه‌هاندنا هاریكاریان دكه‌ت بۆ په‌نابه‌رێن كه‌مپا ناڤبرى، بۆ ڤێ یه‌كێ ژی به‌رێز سالم سعید تاهر به‌رپرسێ راگه‌هاندن و په‌یوه‌ندیان ل بۆردێ كاروبارێن مرۆڤایه‌تى بۆ مالپه‌رێ برها گۆت: ستافێ بۆردێ كاروبارێن مرۆڤایه‌ت ب هه‌ماهه‌نگى دگه‌ل چه‌ندین رێكخراوان به‌رده‌وام كار دكه‌ت پێخه‌مه‌ت خزمه‌تكرنا په‌نابه‌ران و هه‌مى هاریكاریێن مرۆڤایه‌تى دهێنه‌ پێشكێشكرن، دیسان ئاماژه‌ دا كو ده‌زگایێ خێرخوازى یێ بارزانى رۆژانا سێ دانا خوارنێ لسه‌ر په‌نابه‌ران به‌لاڤ دكه‌ت، و ئه‌و دێ به‌رده‌وام كار كه‌ن پێخه‌مه‌ت خۆشكرنا ره‌وشا په‌نابه‌رێن رۆژئاڤایێ كوردستانێ
هه‌ژى گۆتنێ یه‌ كو ژمارا په‌نابه‌رێن رۆژئاڤایێ كوردستانێ ئه‌وێن هاتینه‌ كه‌مپا به‌رده‌ره‌ش ژ 2586 خێزانا پێك دهێن كو دبنه‌ 10839 كه‌سان و ل سه‌ر 2673 خیڤه‌تان هاتن به‌لاڤكرن كرن، و پشتى ل كه‌مپا به‌رده‌رش جه نه‌مایى په‌نابه‌رێن رۆژئاڤا هاتن ره‌وانه‌كرن بۆ كه‌مپا گه‌ویلان و نوكه‌ بتر ژ 700 كه‌سان لێ هاتنه‌ ئاكنجى كرن