پارێزگه‌ها دهۆكێ كۆمبوونا هه‌یڤانه‌ یا هه‌ماهه‌نگى دگه‌ل رێكخراوێن(یو ێن) و رێكخراوێن مرۆڤایه‌تیێن ده‌ولى ئه‌نجام دا

ل رێكه‌فتى٢٢/١٠/٢٠١٩ ل ئاڤاهیێ پارێزگه‌ها دهۆكێ ب سه‌رپه‌رشتیا به‌رێز إسماعیل محمد احمد هاریكارێ پارێزگارێ دهۆكێ بۆ كاروبارێن ئاواران و په‌نابه‌ران و نوینه‌رێن وبه‌رپرسێن رێكخراوێن UN ورێكخراوێن مرۆڤایه‌تیێن ده‌ولى كۆمبوونا هه‌ماهه‌نگى یا پارێزگه‌ها دهۆكێ و رێكخراوێن ناڤبرى ل سه‌ر دۆماهیك پێشهات سه‌باره‌ت ره‌وشا په‌نابه‌ران وگه‌هاندنا هاریكاریان هاته‌ ئه‌نجام دان

ل ده‌ستپێكێ به‌رێز إسماعیل محمد سۆپاسیا رێكخراوێن ئاماده‌بووى كر ل سه‌ر كار و خزمه‌تێن وان ل ناڤ ئاواران و په‌نابه‌ران و بتایبه‌ت ئه‌و رێكخراوێن ل ناڤ په‌نابه‌رێن رۆژئاڤایێ كوردستانێ كار دكه‌ن، دیسان داكوكى ل هه‌ماهه‌نگى و بتر كار كرنێ كر، هاریكارێ پارێزگارێ دهۆكێ داخواز كر كو رێكخراو كارێن باش ئه‌نجام بده‌ن و خزمه‌تێ پێشكێشى په‌نابه‌رێن رۆژئاڤایێ كوردستانێ بكه‌ن ب تایبه‌ت ل كه‌مپا به‌رده‌ره‌ش

ژلایێ خۆڤه‌ رێكخراوێن به‌شدارى كۆمبوونێ دا پلان و به‌رنامه‌ خۆ دیاركرن سه‌باره‌ت چاوانیا به‌رهه‌ڤكرن بۆ وه‌رزێ زڤستانێ و گه‌هاندنا هاریكاریان بۆ په‌نابه‌ران و ئاواران ب ئارمانجا بتر باش كرنا ره‌وشا ئاواران و په‌نابه‌ران و بتایبه‌ت ئه‌و په‌نابه‌رێن نوو هاتن پارێزگه‌ها دهۆكێ و ل كه‌مپا به‌رده‌ره‌ش هاتن نشته‌جێ كرن