شانده‌كى هه‌رێما نورد راین یا ئه‌لمانیا سه‌ردانا كه‌مپا مام ره‌شان كر

ئه‌ڤرۆ رێكه‌فتى 16/10/2019 ب ئاماده‌بوونا به‌رێز إسماعیل محمد احمد هاریكارێ پارێزگارێ دهۆكێ بۆ كاروبارێن ئاواران و په‌نابه‌ران و به‌رێز سردار شێخ یحیى ده‌ڤه‌ردارێ شێخان، شانده‌كى هه‌رێما نورد راین یا ئه‌لمانى كو پێك هاتى بوون ژ به‌رێزان يواخين شتامپ جێگرێ سه‌رۆك وه‌زیرێن هه‌رێما نوردن و وه‌زیرێ كاروبارێن كوچبه‌ریێ وسردار یوكسل ئه‌ندامێ په‌رله‌مانێ ئه‌لمانیا و یان یسن به‌رپرسێ رێكخراوا كاریتاس و خانم باربارا كونسلا گشتى یا ئه‌لمانیا ل هه‌رێما كوردستانێ سه‌ردانا كه‌مپا مام ره‌شان یا ئاوارێن شه‌نگالێ كرن
ل ده‌ستپێكێ هاریكارێ پارێزگارێ دهۆكێ به‌رێز إسماعیل محمد سۆپاسیا شاندێ میڤاندار كر ژبۆ سه‌ردانا وان بۆ پارێزگه‌ها دهۆكێ و ژنیزیك هایداربوون ل سه‌ر ره‌وشا ئاواران و سۆپاسیا حكومه‌تا ئه‌لمانیا كر ژبه‌ر پشته‌ڤانیا به‌رده‌وام دبوارێ مرۆڤایه‌تى دا بۆ هه‌رێما كوردستانێ، هه‌رۆهۆسا هاریكارێ پارێزگارێ دهۆكێ داخواز كر كو بتر پشته‌ڤانى بهێت كرن و ب تایبه‌ت پشتى ره‌وشا رۆژئاڤایێ كوردستانێ تێك چۆى و ژماره‌كا مه‌زن یا په‌نابه‌ران قه‌ستا هه‌رێما كوردستانێ كرى
ژلایێ خۆڤه‌ به‌رێز يواخين شتامپ سۆپاسیا پارێزگه‌ها دهۆكێ كر ژبۆ وى كارێ مرۆڤایه‌تى یێ پێشكێشى ب سه‌دان هه‌زاران ئاواران و په‌نابه‌ران دكه‌ت وئاماژه‌ دا كو ئارمانجا سه‌ردانا وان داكو ژنیزیك هایدار بوون ل سه‌ر ره‌وشا ئاواران ل هه‌رێما كوردستانێ و چاوانیا ڤه‌گه‌رانا وان ل پاشه‌رۆژێ
پاشى شاندێ میڤاندار سه‌ردانه‌ك دا ناڤا كه‌مپا و چاڤ پێكه‌فتن دگه‌ل چه‌ند خێزانان كرن و وهه‌رهۆسا سه‌ردانا یه‌ك ژ قۆتابخانێن ناڤا كه‌مپێ كر پێخه‌مه‌ت ژ نیزیك گۆهدار بوونا ره‌وشا ئاواران و گه‌هاندنا هاریكاریان داكو ره‌وشا ژیارا ئاواران و په‌نابه‌ران باشتر بیت